القاهرة 04 يونيو 2024 الساعة 11:18 ص
 

شعر: محمد علي حسن

مش كل وَقعة بتيجي تعمل كَسر

في وقعة لازم تبقى ليك بحياة

صادق قوي كل اللي داق الجَبر

صادق كمان كل اللي عاش معاناة

دنيتنا أكبر دنيا كدابة

فيها الأمان وَنسان وبتجرحه ديابة

عايز تعيش صَدَّق كلام كداب

عايز تموت كدَّب في ناس قلَّابة

وانا اشتريت من صِنف كل الناس

وحاربت نَفسي وروحي وحياتي

وداريت وجيعتي ودوست ع الإحساس

وخسرت نَفسي وعشت في شتاتي

كان الشتا ميِّت وانا البردان

كانت شقوق قلبي ناقصها بيبان

كان الوجع ناغز في نبض الحب

وانا روحي عاشت صبري بالأحزان

ماباقيلي غيرِك وانتي زوادي

الزاد عيونِك واللقا راضي

خطفتي مني الحزن والمواويل

رَمِّمتي فيا الشَق ع الهادي

فاضل لعمري أبات في حضنك يوم

لا يهمني غيرك حتى ولو محروم

البُعد عنك موت وانا مُت من بدري

ردِّيتي ليا النَفَس مابقيتش يوم مهزوم.