|
القاهرة 06 يونيو 2023 الساعة 11:44 ص
شعر: حنان شاهين
صليت.. وصمت..
وأديت الأمانة
بس حاسة روحي خايفة
من لقاك يوم القيامة
احتمال إني عصيتك
في سجودي
لما مرة طال شرودي
في جملة قالها لنا المدرس
"المحبة خوف خيانة"
يومها صحاني الأدان
كنت عايزة ساعتها أنام
وأبقى أصلي لما أصحي
الصبح عادي
بس قمت أجر نفسي
من سريري!!
قمت خوف
كان سجودي يومها خوف
كان دعايا برضه خوف
و كل مرة كنت أجي لك فيها خوف
كنت أحس بشيء كاسرني
شيء بيكبر جوا مني
ويقاسمني في الحياة
لما صار الخوف إله
هاتسامحني؟
لما ثورت في مرة
عالشيخ اللي قال
إني ناقصة دين وعقل
وإن ليا نص ورث
ونص دية
بس أنا استغفرت يومها
واعتذرت عن جموحي
واقتنعت إني ببالغ في طموحي
واعترفت بحجم روحي
وإني أنثى
وصوتي عورة
ومن يوميها صوتي واطي
بس كان جوايا لسه بقايا ثورة
هتسامحني؟
كنت بادخل أوضتي وحدي
اسمع المزيكا
وارقص أو أغني
وإن لمحت خيال أبويا
أعمل إني
... كنت باعمل أي حاجة
وإن سألني اكدب عليه
كنت أقوله إني باذاكر
أو بصلي
كنت خايفة من عقابه
نفس خوفي من عقابك
عشت عمري كله أكدب
لما صار الكدب عادة
وكل مرة كنت أكدب فيها
أحس بشيء كاسرني
شيء بيكبر جوا مني
و يقاسمني في الحياة
هتسامحني؟
لما كنت باقول لحد إني
باحبه
والحقيقة إني عشت العمر
ما عرفتش أحب
حتي نفسي
رغم إن الحب كان
في الأصل فرض
من قبل بعث الأنبيا
و من قبل خلق الأرض
قلب راضع م البداية
خوف وكدب
مستحيل إنه يحب
هتسامحني؟
إني ما عرفتش أحب ؟
... قلبي شافك في المساجد
عطر وردة
في الموسيقى
صوت كمنجة
في الشوارع
بنت رايحة المدرسة
بفيونكة بيضا
مالية كل الدنيا بهجة
رغم عنهم
رغم تأويلهم
ونارية خطبهم
عن عذابك
وانتقامك
والجحيم
رغم خوفي
وارتعاشة روحي منهم
لسه فاضل مني حاجة
حاجة زي حنيني ليك
حاجة كنت بحسها
وانا باحتمي م الخلق بيك
حاجة ما بتشبهش حاجة
بس حلوة
حاجة بتخليني
رغم كل ذنوبي دي
عشمانة فيك
قلبي سلمته إليك
لو وزنته بريشة يخسر
يا حبيبي
ارمي قلبي في الجحيم
أو سامحني.
|