القاهرة 28 يوليو 2026 الساعة 09:32 ص
 

شعر: حمدي عمارة

آدي القصيدة ابتدت بالكدب
.... معرفشي !
يعني تهدّ الدُّوْر
من قبل  " م "  اللعبة....
وتقوللي مَلَعِبشِي ؟!
طب ليه تِدُوْر "ع" الحِتَت
لجلن تلم الودع
الودعة دِيَّا ضكر
والتانية دي نتاية
وتعيد كمان "ع" الملا
إنتي اللي نسَّاية
يا ام القفف كام لون
تزورينا وتوشوشي. .......
لما الخطوط ابتدتْ
تاخد مسار " فـُكِّني"  .....
على كف مظبطشي ؟!
طبْل الجيران اتمزق
ولا شَدِّتْ الزَّمْرَة
لفُّوا العيال للرُّكَب
مين اللي شاف طبَّال
يضرب ميسمعشي؟!
ألطم ...... ؟
ولاَّ انت تجيب لَطَّامَة ؟!
متقولشي  ......

منك لتعب السر
قهر الحشا يفشي .....
ولا كنلِّي في المرقعة
ولا انت متشوفشي  ....
غزل البنية اتفرط
من عتبة الجارة
للعَمْشَة بتحسِّس
على وَجْعَة تبسطها
تطلع.... ؟
متطلعشي .... ؟!
مع إن كل الكُبَب
فنَسُوا من الخرابين
على طول غَبَرْة الدرب
زاموا في نفس واحد
الله .......
مغزلتشي!