القاهرة 16 فبراير 2015 الساعة 03:42 م
ريقك ناشف ؟!
اشرب
لحد العطش الغارز سنه فى لحمة جوفك
ينفض ع الكون الأحزان
اللى فى حضنك مكبوتة
وموت
اعطش موت
اشرب موت
بس اياك تغرق فى سكوت
صمتك موتك
جاهر بالعطش اللى ماليك
اطلب حقك
كل ما ليك
من أيام عهد المماليك
والقلعة بتشلب أحزان
والإنسان
لسه بيعطش للأغنية
للكلمة اللى بجد أبية
للحرية
واحنا فى زمن العطش الناتش طرف الكلمة من البوح
اللى يهز الروح
تنطق مخنوقة
تحس بديق
ولا ميت ابريق حرية
تكفى كفوفى الناشفة
تندى وترجع تانى تنبت قول
الصوت مقتول
وكلامك طالع من جواك مهزوم
وكأنك خايف
ريقك ناشف
طب ما احنا فى عصر الحريات
اشرب