القاهرة 18 يناير 2015 الساعة 02:28 م
جلست - فاتن حمامة على كرسى عال فهى لا تحب أن تغطس فى فوتيل.. اللون الأبيض، لونها المفضل والخضرة عشقها واللوحات الفنية لمشاهير الفنانين «جيرانها» الدائمون.
• - فاتن : مش عايزة أقول ولا أخرج ولا أتكلم عندى حالة عايزة أقوم وقت ما أقوم. آخذ فنجان قهوتى على مهل. أتفرج على حاجة ولو ملياش نفس أستنى شوية ولو عندى ميعاد عاوزة اللى يقومنى. ده سن العواجيز بأه!!
الشبه بين الفنان والسياسى
** فوزى : فيم يتشابه الفنان والسياسى؟
- فاتن : كلاهما مهموم بوطنه
** فوزى : وأظن الاهتمام بالحياة الشخصي
- فاتن : الحياة الشخصية ملك الفنان أو السياسى وأنا ضد النبش والنخربة والتلفيق.
الفلول
** فوزى : هل سمعت عن مصطلح «الفلول»؟
- فاتن : تعبير بيقسمنا أنا عمرى ما تخيلت أننا كمصريين نتقسم بالشكل ده وعاوزين نوقع ده، ونخسف بده ونسخف كلام ده.
المفروض التفكير بعقل نحاكم اللى لازم يتحاكم مش اللى الناس تشاور عليه، فيه قانون.
** فوزى هناك قائمة سوداء للفنانين اللى مانزلوش ميدان التحرير.
- فاتن : : أى حركة سياسية فى الشارع تحتاج إلى تقييم أولاً مش عميانى.
خوف الحمامة من الاخوان
** فوزى : هل أنت خائفة على المجتمع من «الأخونة»؟
- فاتن : لا أخاف كلنا مسلمون وطول العمر عايشين مفيش تفرقة ومسلمون وإخوان مسلمين الكل بيقول بسم الله الرحمن الرحيم.. ولنا رب واحد.
** فوزى : إضرابات الأطباء، هل أزعجتك؟
- فاتن حمامة بحدة: طفح بهم الكيل، فهل معقول مرتب دكتور شاب أقل من مرتب شغالة وبعدين مستوى المعيشة صار ناراً ليس فى مصر بل فى العالم.
** فوزى : سألتك مرة هل تخرجين فى مظاهرة، وقلت أنا أتظاهر بفنى.
- فاتن حمامة: أقول رأيى فى شغلى
** فوزى : هل تغيرت مصر بعد ثورة يناير؟
- فاتن : مصر، أصبحت «بركان» مش عارفة حيهمد إمتى
** فوزى باديا : مسيرة المراة المصرية...
- فاتن حمامة قاطعة: إحنا بنرجع لورا! متسائلة: معقول البنت تتجوز فى السن المبكر جداً؟
مستطردة قائلة: ده جهل ولهذا السبب يجب أن يحتل التعليم المرتبة الأولى من الاهتمام.
اراء الحمامة فى افكار افلامها
** فوزى : اذا تحدثنا عن افلامك وارائك فى افكارها يعنى اذا بدانا "بافواه وارانب"
- فاتن : "افهموا بأه.. صحيح كل بنى آدم له رزقه! لكن مانبقاش بنخلف عمال على بطال ونقول العيال عزوة، تكون النتيجة إيه.
فقر ومرض والعيال تموت من الجوع إعقلها وتوكل."
** فوزى :"لا وقت للحب"
- فاتن : "أنت دايماً فى قلبى، لكن قلبى كمان مخطوف على البلد"
** فوزى :مسلسل وجه القمر
- فاتن : "الزعاق والصراخ مش وسيلة تفاهم بين اثنين. إزاى تكون معد لبرنامج يحل مشاكل الناس ومش عارف يحل مشكلته مع مراته"
** فوزى :ضمير ابلة حكمت
- فاتن : "أهم حاجة فى المدرسة هو المدرس نفسه اللى بيربى، أهم من البنا ومن الملاعب ومن الفصول"
تجربة - فاتن حمامة مع الاى باد
- فاتن : لازم نلحق العالم، لازم نلحق التطور وإلا حنفضل جهلة فيه تكنولوجيا نستفيد بها فى الطب والصناعة، مش كفاية نعرف نستخدم الموبايل.
أنا مثلا حديثة عهد بالآى باد وجبت معلم كمبيوتر ويفهمنى إزاى أشوف الأخبار والجرائد بحاول أفهم.
وأصبح الآى باد مهماً وأنا خارج مصر وأرى محطات أثناء البث على الهواء وسعيدة به لأنه ينقلنى للعالم بمجرد ضغطة!
تواصل - فاتن حمامة مع الاحداث
- فاتن : أصبحت وأنا بره مصر أقرأ الصحف الصادرة كل يوم وممكن أشوف أحداث حصلت. لازم أكون على علم بأخبار البلد وأرى كل الآراء لأن العالم ارتبط ببعضه، والآى باد منحنى سهولة فى التعامل، علشان كده بقول لكل فنان صاعد أو فنانة ناشئة لازم يبقى عندك حد أدنى من المعلومات والحصول عليها متاح جداً.
التعليم فى مصر
** فوزى : أى تعليم فى مصر تريدين؟
- فاتن : التعليم اللى يخلى الطفل يفكر، وتلميذ الابتدائى يبحث عن المعلومة، وتلميذ ثانوى يكتشف ميوله.
ومهم جداً جداً جداً تعليم لغة أجنبية لاتساع الأفق شوف قلت لك كام مرة كلمة مهم اللغة"
** فوزى : أين مقتل بلد؟
- فاتن بعد تفكير: إفلاس خزينتها. والفتنة الطائفية والسلاح فى الشارع فى إيد كل من هب ودب ده شىء غير معقول.
** فوزى : كيف نرتقى فى التحاور؟
- فاتن : أنت لمست نقطة مهمة دلوقتى أنا باسمعك بجاوب عليك تحس إنى خلصت الإجابة تسأل من جديد وشايفاك بتسمعنى مش مشغول بورق أو أى حاجة وبتدينى فرصة اتكلم وتقاطعى للاستفسار.
لكن أنا بشوف حوارات فى التليفزيون الكل بيتكلموا فى وقت واحد محدش بسيب التانى يتكلم وأنا قاعدة أتفرج ألاقى نفسى باكلم الشاشة وأقول: سيبه يكمل رأيه..! على فكرة فى إنجلترا يدرس الأولاد أسلوب الديالوج ويعلمك آداب المناقشة امتى تتكلم وامتى تسكت ده علم هنا كله بيقاطع كله وتتوه الفكرة.
- فاتن حمامة والعالم من حولها
** فوزى : لو تحدثت - فاتن حمامة عن الدول الاخرى فى العالم فماذا تقول؟
- فاتن : فى ماليزيا عقوبة لمن يلقى ورقة أو بقايا أكل فى الشارع. البلد زى الفل وفى انجلترا قانون لاحترام الخصوصية وعقاب تشويه الشخصيات العامة أو الأفراد العاديين على شاشات النت.
وفى المانيا تعطيل سيارة الحريق عن مسارها جريمة. كذلك وقوف سيارتك الذى يخفى مصادر الميه وتركب فيها الخراطيم للإطفاء.
وفى دبى، كسر الإشارة عدة مرات والسرعة داخل المدينة يعرضك لسحب الرخصة.
وفى هايد بارك فى لندن لكل المظاهرات والاحتجاجات بشكل متحضر. طبعا ده سلوك شعب
شىء من الفن
** فوزى : ما أخطر ما فى الفنان؟
- فاتن حمامة مسرعة: إحساسه يا مفيد.
ممكن ممثلة تقول نفس الكلام اللى تقوله ممثلة أخرى اللى عندها «إحساس» حتصدقها علشان كده الناس كانت بتصدق عبدالحليم وهوه بيغنى.
** فوزى : أتذكر كامل الشناوى كان يقول لنا «لا تصدقوا عبدالحليم إلا عندما يغنى
فى يوم ما اخترت فى مسلسل «وجه القمر» شابتين هما غادة عادل ونيللى كريم، وهما زهرتان موهوبتان هل راهنت عليهما.
- فاتن : الاتنين ماشاء الله، غادة عادل نضجت بتمثل بإحساس، ونيللى كريم واخدة جايزة.
** فوزى : اشتقنا لفيلم لعادل امام ومن بطولتك
- فاتن : يكفى إن عادل إمام أعطانا بأفلامه سعادة وأعطانا ابتسامة وفناً وفهماً.
احمد رمزى
** فوزى :احمد رمزى
- فاتن : صديق بمعنى الكلمة فقدناه خد بالك إن صداقات الإنسان القديمة هى صداقاته الحقيقية، أما الصداقات الطارئة فهى معارف لا أكثر.
التليفزيون وسرقة جمهور السينما
** فوزى : هل سرق التليفزيون الناس من السينما؟
- فاتن : فى هذا الزمن حصل
** فوزى :لماذا اعتزازك الشديد بالمخرج بركات؟
- فاتن : عنده إحساس وكنا متفاهمين.
** فوزى :وحسين كمال؟
- فاتن : فنان وبركات حاجة وحسين كمال حاجة تانية، وعمل أفلام حلوة
** فوزى :وصلاح ابو سيف
- فاتن : : له خصوصيته
** فوزى :وخيرى بشارة
- فاتن : أن بحب شغله أوى
** فوزى :ويوسف شاهين
- فاتن : اشتغلت معاه وأنا صغيرة، له طريقته، وأنا لىّ طريقتى، إحنا لا نختلف فى الرأى، لكن فى الرؤية، أنا شايفة الشخصية كده ومعتزة بدورى، وهو شايف الشخصية كده وعنده اعتزاز بشغله.
الشاشة ثلاثية الابعاد
** فوزى : هل رأيت الشاشة ثلاثية الأبعاد بالنظارة الخاصة؟
- فاتن : فيلماً واحداً لكننى كرهته، أنا لا أحب ما يحزننى كفانا حزناً.
** فوزى : هل تابعت أفلام ما بعد الثورة؟
- فاتن : الأغانى المبتكرة اللى بتطلع فى التليفزيون بعد الثورة من أجمل ما يمكن لحنا وكلاماً وصدق الشباب اللى بيغنوا وأصل إحساسهم، ومعظم هذه الأعمال مجاميع، ودى ثورة فى الأغنية.
الاشتياق لزمن الروقان
** فوزى : هل تفتقدين زمن الروقان؟
- فاتن : آه.. أيوه مفتقدة الروقان.
فاستطردت: أحب أشوف أفلام الريحانى أو أى فيلم من الأفلام القديمة الأبيض وأسود عايزة أحس إن أنا فى زمانى!